Voorspoed vir die nuwe jaar. Ek hoop regtig dat 2023 ’n baie goeie jaar sal wees en dat jy al die pad die guns van ons Hemelse Vader oor jou sal ervaar.

Daarom wil ek jou uit my hart uit seën met hierdie seëngebed uit die vroeë kerk:

Die Here is voor jou om die pad gelyk te maak.
Die Here is langs jou om jou hand vas te hou.
Die Here is agter jou om die Bose te verslaan.
Die hand van die Here is onder jou om jou te dra as jy swak is en jou op te help as jy val.
Die Here is rondom jou om jou te beskerm.
Die Here is bokant jou om jou te seën.
Die Here is binne-in jou, want Hy lei jou deur Sy Heilige Gees.
Die Here is vir jou, want Jesus pleit vir jou.
Die Drie-enige God is by jou, van nou af tot in ewigheid.
Amen.

Mag jy aan die einde van Desember terugkyk oor jou jaar en sê: Ja, dit was waar, God was orals by my!

Kort-kort kom mense oor ons pad wat verbaas is oor waar Kruispad orals saad saai. Daarom noem ek dit vinnig hier. Dalk wil jy ook daarvan ontvang. Onthou, alles is GRATIS beskikbaar en behalwe die Sondae eredienste is alles ook in Engels beskikbaar.

Bybelstudies word 3 maal per week via e-pos, WhatsApp en sosiale netwerke uitgestuur. Ons stap vers vir vers deur die Bybel en trek op die stadium by Jakobus.

Geestelike audios/klankgrepe (4 minute) om jou moed te gee vir die wêreld daar buite. Ook drie keer per week via WhatsApp.

Kruispad247TV Aanlyn eredienste Elke Sondag om 09:00 word daar op YouTube en Facebook ’n nuwe erediens uitgesaai waar God se Woord in vandag se woorde verkondig word. Dit is uniek waar die konteks die teks verhelder en die kyker of luisteraar gelei word in ’n lewe naby aan die Vader. Dit kan ook as klankgreep aan luisteraars op hul foon gestuur word. Alle vorige video’s is op ons YouTube kanaal Kruispad247TV beskikbaar.

Webtuiste en App Al bogenoemde en vorige Bybelstudies, audios, preke en nog baie meer is beskikbaar by kruispad.com. Laai die App op jou foon en al die informasie is met die druk van ’n vinger beskikbaar. Tik crossroad247 in jou AppStore en kies Afrikaans/Engels met die eerste oopmaak.

Boeke Dagstuk- en Bybelstudieboeke is beskikbaar by ons aanlyn boekwinkel, kruispadboeke.com.

Daar is baie mense wat geestelike versterkings nodig het. Soveel wat honger en dors is vir die Woord van God. Wil jy ons nie help om die saad in die grond te kry nie? Stuur asb. hierdie inligting aan soveel mense soos wat die Gees jou lei. Só kan jy werklik ’n verskil in ander se lewens maak of dalk net ’n lewe red.

Ek sien uit om die jaar saam met jou te stap. Mag ons almal aan die einde kom en uitroep: God was orals met ons!

Mooi loop!

Gerjo Ben